सातारा : म्हसवड पोलीस ठाणे हद्दीतील तुपेवाडी (ता. माण) येथे स्थानिक गुन्हे शाखेच्या पथकाने गांजाची लागवड करणाऱ्या इसमावर धाड टाकून मोठी कारवाई केली आहे. या कारवाईत रुपये१० लाख ११ हजार ९५० किमतीचा तब्बल ४० किलो गांजा जप्त करण्यात आला आहे. आरोपी शहाजी दाजी तुपे (वय ६५, रा. तुपेवाडी, वरकुटे, ता. माण, जि. सातारा) यास ताब्यात घेण्यात आले असून, त्याच्यावर एन.डी.पी.एस. ॲक्टनुसार गुन्हा दाखल करण्यात आला आहे.

याबाबत पोलिसांनी दिलेली माहिती अशी, स्थानिक गुन्हे शाखेचे पोलीस निरीक्षक अरुण देवकर यांना मिळालेल्या खात्रीशीर माहितीच्या आधारे ही कारवाई करण्यात आली. आरोपी तुपे यांनी आपल्या मालकीच्या शेतात विक्रीसाठी गांजाच्या झाडांची लागवड व जोपासना केल्याची माहिती मिळाल्यानंतर पोलीस उपनिरीक्षक विश्वास शिंगाडे यांच्या पथकाने म्हसवड पोलिसांबरोबर संयुक्त कारवाई केली.

दि. ९ ऑक्टोबर २०२५ रोजी पथकाने तुपेवाडी येथे छापा टाकला असता, शेतात एकूण ४० गांजाची झाडे सापडली. तपासात ही झाडे ओलसर अवस्थेत, हिरवट पाने, फुले, बीज आणि काड्यांसह सुकवण्यासाठी टांगलेली असल्याचे दिसून आले. त्याचे वजन ४०.४७८ किलो इतके निघाले. सदर गांजाची बाजारातील किंमत रुपये १०,११,९५० इतकी असल्याचे पोलिसांनी सांगितले.

या प्रकरणी म्हसवड पोलीस ठाण्यात गुन्हा दाखल करण्यात आला आहे. आरोपीवर कारवाई करण्यात आली आहे. ही कारवाई सातारा जिल्हा पोलीस अधीक्षक तुषार दोषी आणि अपर पोलीस अधीक्षक डॉ. वैशाली कडुकर यांच्या मार्गदर्शनाखाली करण्यात आली.

पोलीस निरीक्षक अरुण देवकर यांच्या नेतृत्वाखालील कारवाईत सपोनि रोहित फर्णे, पोउनि विश्वास शिंगाडे, परितोष दातीर, म्हसवड पोलीस ठाण्याचे सपोनि अक्षय सोनावणे, पोउनि अनिल वाघमोडे, तसेच अंमलदार अतिश घाडगे, शिवाजी गुरव, सचिन साळुंखे, सनी आवटे, अमित सपकाळ, गणेश कापरे, स्वप्नील कुंभार, धीरज महाडीक, अमर नारनवर, शशिकांत खाडे, रुपालो फडतरे, अभिजीत बहाद्दले, राहुल थोरात, वसिम मुलानी व फॉरेन्सिक टीम सहभागी होती. कारवाईतील यशस्वी पथकाचे विशेष अभिनंदन पोलीस अधीक्षक तुषार दोषी आणि अपर पोलीस अधीक्षक डॉ. कडुकर यांनी केले.

सातारा जिल्हा पोलिसांनी गेल्या काही महिन्यांपासून अवैध अंमली पदार्थांच्या व्यवसायाविरुद्ध मोहिमेला गती दिली आहे. या कारवाईमुळे माण तालुक्यातील अंमली पदार्थांच्या साखळीवर मोठा आघात झाल्याचे मानले जात आहे.