सातारा : शेंद्रे, ता. जि. सातारा येथील एका ॲल्युमिनियम फौन्ड्री कंपनीत झालेल्या घरफोडी चोरीचा गुन्हा स्थानिक गुन्हे शाखेने अवघ्या दोन दिवसांत उघडकीस आणला आहे. या कारवाईत पोलिसांनी १,८७,५00 रुपयांचा मुद्देमाल ॲल्युमिनियमच्या ६९ विटा (सुमारे ५00 किलो वजन) आणि गुन्ह्यात वापरलेली मारुती ८00 कार असा एकूण माल हस्तगत केला आहे.

या प्रकरणी विजय शंकर पवार रा. रामाचा गोट, मंगळवार पेठ, सातारा, अशोक मोहन मोरे — रा. कोर्टी, ता. कराड, जि. सातारा. या दोघांना अटक करण्यात आली आहे. तर गणेश उर्फ गोट्या लहू बोंडे मूळ रा. पाली, ता. कराड; सध्या रा. काशीळ, जि. सातारा याला लवकरच अटक करण्यात येणार आहे.  

याबाबत पोलिसांनी दिलेली माहिती अशी, दि. 0९ऑक्टोबर २0२५ रोजी शेंद्रे येथील अल्युमिनियम फॉन्ड्री कंपनीतून अज्ञात चोरट्याने ॲल्युमिनियमच्या ६९ विटा चोरून नेल्याची तक्रार सातारा तालुका पोलिस ठाण्यात दाखल झाली होती. या तक्रारीवरून गुन्हा नोंदविण्यात आला. या गुन्ह्याचा तपास सातारा जिल्ह्याचे पोलीस अधीक्षक तुषार दोशी आणि अपर पोलीस अधीक्षक वैशाली कडुकर यांच्या मार्गदर्शनाखाली करण्यात आला. त्यांनी स्थानिक गुन्हे शाखेचे पोलीस निरीक्षक अरुण देवकर यांना गुन्हा उघडकीस आणण्याच्या सूचना दिल्या.

पोलीस निरीक्षक अरुण देवकर यांनी स्थानिक गुन्हे शाखेचे पोलीस उपनिरीक्षक परितोष दातीर यांच्या अधिपत्याखाली विशेष तपास पथक तयार केले.या पथकात पो.हे.कॉ. हसन तडवी, मनोज जाधव, अमृत कर्पे, प्रविण कांबळे, अमित माने, शिवाजी भिसे आणि प्रविण पवार हे अंमलदार सहभागी होते. तपास पथकाने घटनास्थळी भेट देऊन साक्षीदारांची चौकशी केली तसेच तांत्रिक पुरावे तपासून संशयितांचा माग काढला.

दि. १0 ऑक्टोबर रोजी, पोलीस निरीक्षक देवकर यांना विश्वसनीय बातमीदारामार्फत माहिती मिळाली की, या चोरीत रेकॉर्डवरील गुन्हेगार विजय शंकर पवार (रा. रामाचा गोट, मंगळवार पेठ, सातारा) सहभागी आहे. त्या माहितीच्या आधारे तपास पथकाने तातडीने छापा टाकून त्याला ताब्यात घेतले. चौकशीत विजय पवारने त्याचे साथीदारांसह गुन्हा केल्याची कबुली दिली. त्यानंतर पोलिसांनी त्याचा एक साथीदार अशोक मोहन मोरे (रा. कोर्टी, ता. कराड) यालाही अटक केली. आणखी एक साथीदार गणेश उर्फ गोट्या लहू बोंडे (रा. पाली, ता. कराड सध्या रा. काशीळ, ता. सातारा) हा फरार असून त्याचा शोध सुरू आहे.

या कारवाईत स्थानिक गुन्हे शाखेचे पो.नि. अरुण देवकर, सातारा तालुका पोलीस ठाण्याचे पो.नि. निलेश तांबे, सपोनि सुदर्शन काटकर, पो.उप.नि. परितोष दातीर, चालक स.फौ. नाना गुरव, तसेच अंमलदार पो.हे.कॉ. हसन तडवी, मनोज जाधव, अमृत कर्पे, प्रविण कांबळे, अमित माने, शिवाजी भिसे, प्रविण पवार, किरण निकम, झनकर, गायकवाड यांनी मोलाची भूमिका बजावली. याबद्दल पोलीस अधिक्षक तुषार दोशी, अपर पोलीस अधिक्षक वैशाली कडुकर, यांनी संपूर्ण पथकाचे अभिनंदन केले.

चोरीतील मुद्देमाल जप्त

या तपासादरम्यान पोलिसांनी दोन्ही अटक आरोपींच्या माहितीनुसार चोरीस गेलेला मुद्देमाल ॲल्युमिनियमच्या ६९ विटा (५०० किलो वजन) आणि गुन्ह्यात वापरलेली मारुती ८०० कार — असा एकूण १ लाख ८७ हजार ५०० रुपये किंमतीचा मुद्देमाल जप्त केला.