सातारा : निवड श्रेणीच्या प्रस्तावाला मंजुरी आदेश देणेकामी 25 हजार रुपयाची लाच मागितल्या प्रकरणी सातारा जिल्हा परिषदेच्या माध्यमिक विभागातील वरिष्ठ सहाय्यक वैशाली शंकर माने वय 40 यांना लाच लुचपत प्रतिबंधक विभागाच्या पथकाने रंगेहाथ पकडले.

ही कारवाई मंगळवारी दुपारी जिल्हा परिषदेच्या कक्ष आवारात करण्यात आली. तक्रारदार हे सेवानिवृत्त शिक्षक असून त्यांचा 24 वर्षांचा सेवा कालावधी पूर्ण झालेला आहे. निवड श्रेणी प्रस्ताव अंतर्गत त्यांनी माध्यमिक शिक्षणाधिकारी जिल्हा परिषद सातारा यांच्याकडे अर्ज केला होता. या प्रस्तावाच्या मंजुरीसाठी आणि अंतिम आदेशाच्या संदर्भाने आदेश व्हावा याकरिता त्यांनी माने यांची भेट घेतली. तेव्हा या कामाकरता त्यांनी साहेबांना देण्यासाठी 25 हजार रुपये लाच मागितली.

या संदर्भात फिर्यादी यांनी सातारा लाचलुचपत प्रतिबंधक विभागाकडे तक्रार केली. मंगळवारी दुपारी पंचांसमक्ष 25 हजार रुपयाची लाच घेताना संबंधित महिला कर्मचाऱ्याला रंगेहाथ पकडण्यात आले. लाचलुचपत प्रतिबंधक विभागाचे उपअधीक्षक राजेश वाघमारे यांच्या मार्गदर्शनाखाली पोलीस निरीक्षक सुनील पाटील, पोलीस हवालदार प्रवीण निंबाळकर, पोलीस शिपाई माकर व महामुलकर यांनी ही कारवाई केली.

सध्या लाच लुचपत विभागाचा दक्ष सप्ताह सुरू आहे. कोणत्याही लोकसेवकाने शासकीय कामा संदर्भाने लाच मागितल्यास पोलीस उपाधीक्षक लाचलुचपत प्रतिबंधक विभाग सातारा यांच्याकडे तात्काळ तक्रार करावी, असे आवाहन उपअधीक्षक राजेश वाघमारे यांनी केले आहे.