सातारा : बॉम्बे रेस्टॉरंट परिसरात गुरुवारी दुपारी १२ वाजण्याच्या सुमारास भीषण अपघात घडला. इलेक्ट्रिक दुचाकीवरील २८ वर्षीय सारिका सुतार (रा. संगममाहुली, सातारा) या महिलेचा ट्रॅक्टर-ट्रॉलीखाली चिरडून जागीच मृत्यू झाला. या अपघातामुळे परिसरात मोठी खळबळ उडाली.

घटनास्थळावरून मिळालेल्या माहितीनुसार, बॉम्बे रेस्टॉरंटहून अजंठा चौकाच्या दिशेने दोन महिला दुचाकीवरून जात होत्या. त्याचवेळी अजंठा चौकातून ऊसाने भरलेली ट्रॉली घेऊन एक ट्रॅक्टर या मार्गावर आला. टीव्हीएस शोरूमसमोर सर्व्हिस रोडवर येण्यासाठी एक क्रेटा कार अचानक पुढे आली. क्रेटा कारला चुकवताना ट्रॅक्टर चालकाने ट्रॅक्टर उजवीकडे वळवला.याच क्षणी समोरून येणारी दुचाकी समोरील मोठ्या खड्ड्यात आदळली. धक्का बसल्याने मागे बसलेल्या सारिका सुतार खाली कोसळल्या आणि त्यांच्या डोक्यावरून ट्रॅक्टर-ट्रॉलीचे मागील चाक गेल्याने त्यांचा जागीच मृत्यू झाला. प्रत्यक्षदर्शी नागरिकांचा अक्षरशः थरकाप उडाला.

सारिका सुतार या अजंठा चौकातील खासगी वर्गात शिकवण्यासाठी जात असताना हा अपघात घडल्याचे प्राथमिक माहितीवरून समजते.

स्थानिक नागरिकांकडून मिळालेल्या माहितीनुसार, शफीक पठाण यांच्या ट्रान्सपोर्ट व्यवसायातील अनेक वाहने महामार्गावरील सर्व्हिस रोडवर दोन्ही बाजूने बेकायदेशीरपणे पार्क केली जातात. त्यामुळे रस्ता अत्यंत अरुंद होऊन वाहनांना वळण घेणे कठीण जाते. अनेकदा या वाहनांमुळे अपघाताचे प्रसंग उद्भवले आहेत.वाहतूक पोलिसांनी पार्किंग हटवण्याची सूचना दिल्यावर पठाण यांनी वाहतूक पोलीस राजगे यांच्याशी अरेरावीची भाषा वापरत हुज्जत घातल्याची माहितीही पुढे आली आहे.

सेवा रस्त्यांवर वाढला अपघातांचा धोका

रस्त्यावरील खड्डे, रिक्षांचा अनधिकृत थांबा आणि महामार्गावर उतारावर थांबणारी खासगी वाहने यामुळे अपघाताचा धोका वाढत आहे.या परिसरात मोठमोठे खड्डे,सर्व्हिस रोडवरील अनियमित पार्किंग,रस्त्याच्या कडेला अनधिकृत रिक्षा स्टॅंड आणि महामार्गावर खासगी वाहनांचे उतारावर थांबणे यामुळे दिवसभर वाहतुकीचा गोंधळ निर्माण होतो. दुचाकीस्वार खड्डे चुकवण्याचा प्रयत्न करतात आणि त्यामुळे अपघातांची मालिका सुरूच असल्याची तक्रार स्थानिकांनी केली.दरम्यान, या अपघातप्रकरणी संबंधित दोन्ही वाहनचालकांविरुद्ध गुन्हा दाखल करण्याची प्रक्रिया सुरू असल्याचे पोलिसांनी सांगितले.