सातारा : कोंडवे, समर्थ नगर परिसरात दुपारी साडेतीनच्या दरम्यान येथील पेट्रोल पंप परिसरात एक्टिवा मोपेडवरून आलेल्या दोन युवकांनी सातार्‍याकडे जाणार्‍या दुसर्‍या दोन युवकांवर गोळीबार केला. या गोळीबारामध्ये अमर गणेश पवार वय 21 व श्रेयस सुधीर भोसले वय 22 हे दोघे जखमी झाले आहेत. दोघांचीही प्रकृती स्थिर असून त्यांच्यावर क्रांतिसिंह नाना पाटील जिल्हा रुग्णालयात उपचार सुरू आहेत.

गोळीबार झाल्याची माहिती मिळाल्यानंतर सातारा तालुका पोलीस व स्थानिक गुन्हे शाखा तात्काळ ऍक्शन मोडवर आली. सातार्‍याचे उपविभागीय पोलीस अधिकारी राजीव नवले यांनी घटनास्थळाला भेट देऊन पेट्रोल पंप परिसरातील सीसीटीव्ही फुटेज ताब्यात घेतले. गेल्या दहा दिवसातील गोळीबाराचा हा दुसरा प्रकार आहे. गोळीबाराच्या या घटनेनंतर काही काळ या परिसरात भीतीचे वातावरण निर्माण झाले होते. गोळीबार नेमका कशामुळे झाला, याचे कारण अद्याप उलगडलेले नाही. मात्र, जुन्या वादाच्या कारणातून हा गोळीबार झाला असावा, असे बोलले जात आहे. पोलिसांची दोन पथके संबंधितांच्या शोधासाठी रवाना झाली आहेत. 

याबाबत मिळालेली माहिती अशी, गोळीबारात जखमी झालेले दोन तरुण आपल्या गाडीवरून मेढा येथे न्यायालयातील तारखेला हजर झाले होते. ती प्रक्रिया आटोपून ते पुन्हा सातार्‍याच्या दिशेने येत असताना कोंडवे गावाच्या परिसरातील समर्थ नगर हद्दीत पेट्रोलपंपा समोर अचानक मागून आलेल्या एक्टिवा मोपेडवरील दोघांनी त्यांच्या दिशेने गोळीबार केला. त्यांनी हातातील पिस्तुलातून दोन राऊंड फायर केले. मात्र, सुदैवाने अमर व श्रेयस या गोळीबारातून थोडक्यात बचावले. मात्र गोळी चाटून गेल्याने दोघेही जखमी झाले. पुढे स्विफ्ट गाडी आडवी असल्याने हल्लेखोर त्या परिस्थितीचा फायदा घेऊन तेथून पसार झाले. गोळीबाराची घटना कळताच परिसरात भीतीचे वातावरण निर्माण झाले.

गोळीबाराची माहिती समजताच सातारा तालुका पोलीस व स्थानिक गुन्हे शाखा व पोलीस कर्मचारी तात्काळ घटनास्थळी रवाना झाले. तालुका पोलीस स्टेशनचे पोलीस निरीक्षक निलेश तांबे, स्थानिक गुन्हे शाखेचे पोलीस निरीक्षक अरुण देवकर यांनी पेट्रोल पंपावरील कॅमेर्‍यातील सीसीटीव्ही फुटेज ताब्यात घेतले आहे. गोळीबाराचा हा थरार कॅमेर्‍यामध्ये कैद झाला आहे. उपविभागीय पोलीस अधिकारी राजीव नवले यांनी सुद्धा या प्रकाराची माहिती घेत घटनास्थळाला भेट दिली. या कॅमेर्‍यामध्ये विना नंबर प्लेटच्या एक्टिवा गाडीवरून आलेल्या दोन तरुणांनी जखमींवर गोळीबार केल्याचे दिसून येत आहे. यानंतर सातारा तालुका पोलीस यंत्रणा ऍक्शन मोडवर आली असून या युवकांच्या शोधार्थ दोन पथके रवाना झाली आहेत. 

सातारा शहर परिसरात गेल्या दहा दिवसांमध्ये गोळीबाराच्या दोन घटना घडल्या आहेत. कायदा सुव्यवस्थेला आव्हान देणारे गोळीबारासारखे प्रकार घडू लागल्याने पोलिसांच्या कार्यक्षमतेवर प्रश्नचिन्ह उभे राहिले आहे. पोलीस अधीक्षक समीर शेख यांनी स्थानिक गुन्हे शाखेला तातडीने तपासाच्या सूचना दिल्या आहेत. जखमींना क्रांतिसिंह नाना पाटील जिल्हा रुग्णालयात दाखल करण्यात आले असून त्यांची प्रकृती स्थिर आहे. याबाबतचा अधिक तपास सातारा तालुका पोलीस ठाण्याचे पोलीस निरीक्षक निलेश तांबे करीत आहेत.