सातारा : 2021-22 व 2022-23 या आर्थिक वर्षातील जीएसटी टॅक्समध्ये झालेल्या तफावतीवरून दंड व व्याज माफ करण्यासाठी राज्यकर निरीक्षक रोहन सतीश देवकर व अक्षय मोहन फडतरे यांनी 30 हजार रुपयांची मागणी करून 20 हजार रुपये स्वीकार करताना लाचलुचपत प्रतिबंधक विभागाच्या पथकाने रंगेहाथ पकडले असून त्या दोघांवर सातारा शहर पोलीस ठाण्यात गुन्हा दाखल करण्यात आला आहे.

याबाबत मिळालेली माहिती अशी, तक्रारदार यांचे २०२१-२२ व २०२२-२३ या आर्थिक वर्षातील जीएसटी टॅक्समध्ये झालेल्या तफावतीवरून दंड व व्याज माफ करण्यासाठी राज्यकर निरीक्षक रोहन सतीश देवकर व अक्षय मोहन फडतरे (दोघेही वस्तू व सेवा भवन, सातारा येथे कार्यरत) यांनी तक्रारदाराकडे सुरुवातीला ३० हजार रुपयांची लाच मागणी केली. तडजोडीनंतर त्यांनी २० हजार रुपयांवर व्यवहार मान्य केल्याचे पडताळणीत निष्पन्न झाले. या संदर्भात तक्रारदाराने दि. १९ सप्टेंबर रोजी लाचलुचपत प्रतिबंधक विभाग, सातारा येथे तक्रार दाखल केली होती. पडताळणीत लाच मागणीची बाब खरी असल्याचे सिद्ध झाल्यानंतर सातारा शहर पोलीस ठाण्यात या दोन्ही राज्यकर निरीक्षकांविरुद्ध भ्रष्टाचार प्रतिबंधक अधिनियमाखाली गुन्हा दाखल करण्याची प्रक्रिया सुरू आहे. 

ही कारवाई पोलीस उपअधीक्षक राजेश वसंत वाघमारे यांच्या मार्गदर्शनाखाली पोलीस निरीक्षक सुप्रिया गावडे, परिवेक्षण अधिकारी सुनिल पाटील व पथकातील अधिकारी व कर्मचारी यांच्या सहाय्याने करण्यात आली.