मुंबई : आधार वर्च्युअल आयडी म्हणजे 16 अंकी तात्पुरत्या स्वरूपाचा नंबर असतो. हा आधार नंबरचा पर्याय म्हणून वापरता येतो. वर्च्युअल आयडीच्या मदतीने मोबाईल नंबर, बँक खात्याचा नंबर दिल्याशिवाय आपली ओळख दाखवता येते.
आधार कार्ड हे भारतीय नागरिकांसाठी महत्त्वाचे डॉक्युमेंट आहे. अनेक कामांमध्ये आधार नंबर देणे बंधनकारक असते. गेल्या काही वर्षांत भारतात आधारशी संबंधित फसवणुकीच्या घटनांमध्ये मोठ्या प्रमाणात वाढ झाली आहे. या पार्श्वभूमीवर, सरकारने आधार नंबर देण्याची सक्ती कमी करण्यासाठी आधार वर्च्युअल आयडीची सुविधा सुरू केली आहे. यामुळे आधार कार्ड अधिक सुरक्षित राहील आणि फसवणुकीचा धोका देखील कमी होईल. चला तर मग जाणून घेऊया, आधार वर्च्युअल आयडी म्हणजे काय आणि याचे फायदे काय आहेत.

आधार वर्च्युअल आयडी म्हणजे काय?
आधार वर्च्युअल आयडी हा 16 अंकी तात्पुरत्या स्वरूपाचा नंबर असतो. हा आधार नंबरचा पर्याय म्हणून वापरला जातो. वर्च्युअल आयडीच्या मदतीने मोबाईल नंबर किंवा बँक खात्याचा नंबर दिल्याशिवाय आपली ओळख दाखवता येते. आधार नंबरवरून वर्च्युअल आयडी तयार केला जातो, परंतु वर्च्युअल आयडीद्वारे आधार नंबर समजू शकत नाही. प्रत्येक आधार नंबरसाठी फक्त एकच वर्च्युअल आयडी तयार केला जाऊ शकतो. हा वर्च्युअल आयडी किमान एक दिवस व्हॅलिड असतो आणि ती दररोज अपडेट करता येऊ शकतो

UIDAI कडून वर्च्युअल आधार नंबर कसा तयार करावा?
• UIDAI ची अधिकृत वेबसाइट उघडा.
• आधार सेवा विभागात जाऊन वर्च्युअल आयडी जनरेटरवर क्लिक करा.
• त्यानंतर आपला आधार नंबर आणि सिक्योरिटी कोड भरा.
• 'सेंड OTP' या पर्यायावर क्लिक करा.
• ओटीपी मिळाल्यानंतर 'जनरेट VID' वर क्लिक करा.

SMS द्वारे वर्च्युअल आयडी कसा तयार करावा?
रजिस्टर्ड मोबाईल नंबरवरून GVID आणि आधारच्या शेवटचे चार अंक लिहून 1947 वर SMS पाठवा. उदाहरण: GVID1234 असे 1947 वर पाठवा.

mAadhaar ॲपद्वारे वर्च्युअल आयडी कसा तयार करावा?
mAadhaar ॲपमध्ये लॉगिन करा. 'जनरेट वर्च्युअल आयडी' या पर्यायावर क्लिक करा. त्यानंतर आधार नंबर आणि कॅप्चा कोड भरा. 'ओटीपी रिक्वेस्ट' वर क्लिक करा आणि ओटीपी मिळाल्यानंतर 'जनरेट VID' वर क्लिक करा. त्यानंतर तुम्हाला VID क्रमांक मिळेल.