सातारा : जकातवाडी, ता. सातारा चे ग्रामदैवत असलेल्या श्री पाडळेश्वर देवाची वार्षिक यात्रा विविध धार्मिक कार्यक्रमांनी सुरू झाली आहे. ही यात्रा जकातवाडीकरांसाठी धार्मिक कार्यक्रमांची पर्वणीच ठरत असते. शुक्रवारी यात्रेनिमित्त विविध कार्यक्रमांबरोबरच हरी जागर झाला. शनिवारी पहाटे शनिवारी यात्रेचा मुख्य दिवस. पहाटे श्री पाडळेश्वर देवाला विधिवत शोडषोपचारे अभिषेक करण्यात आला. यानंतर देवाला नवीन पोशाख परिधान करून यथासांग पूजा करण्यात आली. त्यानंतर देवाची महाआरती झाल्यावर भाविकांनी दर्शनासाठी रांगा लावल्या होत्या. ग्रामस्थांसह सुवासिनींकडून देवाला पुरणपोळीचा नैवेद्य, फुलांचे हार आणि श्रीफळाने मंदिराचा गाभारा भरला होता. यात्रेनिमित्त मंदिराला आकर्षक विद्युत रोषणाई करण्यात आली आहे. रात्री महाआरतीनंतर छबिना पालखी मिरवणुकीचा प्रारंभ मान्यवरांकडून करण्यात आला. फुलांच्या माळांनी सजवलेल्या पालखीत श्री पाडळेश्वर देवता विराजमान झाल्यानंतर फटाक्याच्या आतषबाजीत मिरवणुकीस सुरुवात झाली. या मिरवणुकीमध्ये लहान मुलांसह अबाल वृद्धांमध्येही उत्साहाचे वातावरण दिसून येत होते. यात्रेच्या अनुषंगाने समस्त जकातवाडी ग्रामस्थ व पाहुणेमंडळी भक्तिमय वातावरणात रंगून गेले होते. यात्रेनिमित्त मेवा-मिठाईची दुकाने, खेळण्याची दुकाने, पाळणे यांची रेलचेल होत असते. त्यानिमित्ताने या दुकानांचा लहान मुलांसह मोठ्यांनीही याचा आनंद लुटला. घरा-घरांतून येत असलेला पोळ्यांचा दरवळ घर परिवारासह पाहुण्यांचे मन मोहून टाकणारा होता. एकंदरीतच श्री पाडळेश्वर देवाच्या वार्षिक यात्रेच्या अनुषंगाने जकातवाडीतील वातावरण भारुन टाकणारे होते. रविवार दिनांक 20 रोजी लोकनाट्य तमाशासह विविध मनोरंजनाच्या कार्यक्रमाचे आयोजन करण्यात आले आहे. यात्रा यशस्वी करण्यासाठी यात्रा कमिटी, विविध मंडळांचे सदस्य परिश्रम घेत आहेत. जाधव कुटुंबीयांना या यात्रेचा विशेष मान असतो.