सातारा : महाराष्ट्र शासनामार्फत राज्यात अॅग्रीस्टॅक योजना दिनांक १४ ऑक्टोबर २०२४ पासून राबविण्यात येत आहे. यामध्ये खातेदार असणाऱ्या शेतकऱ्यांनी नोंदणी केल्यावर त्यांना फार्मर आयडी (शेतकरी नोंदणी क्रमांक) मिळणार आहे. अद्याप ज्या शेतकऱ्यांनी फार्मर आयडी काढला नसेल त्यांनी त्वरीत काढून घ्यावा, असे आवाहन जिल्हा अधीक्षक कृषी अधिकारी कार्यालयाकडून करण्यात आले आहे.

कृषी विषयक योजना जसे की पीक विमा, फळपीक विमा योजना, नैसर्गिक आपत्ती पीक नुकसान भरपाई, पी एम किसान योजना इ. चा लाभ घेण्यासाठी फार्मर आयडी अनिवार्य करण्यात आला आहे. तसेच केंद्र शासनाने पी. एम. किसान योजनेमधील लाभार्थी यांना अॅग्रीस्टॅकमध्ये नोंदणी करणे बंधनकारक केले आहे. तसेच पी.एम. किसान पोर्टलवर नवीन स्वयंनोंदणी करण्यासाठी देखील अॅग्रीस्टॅकमधील फार्मर आयडी बंधनकारक केला आहे.  

फार्मर आयडीसाठीनोंदणी करणेसाठी mhfr.agristack.gov.in या पोर्टलवर शेतकऱ्यांना स्वतः नोंदणी करता येणार आहे. तसेच CSC केंद्र आणि कृषि विभाग,महसूल विभाग,ग्रामविकास विभागातील अधिकारी कर्मचारी यांचेमार्फत ग्रामस्तरावर नोंद‌णीचे काम सुरु असल्याने त्यांचेशी संपर्क करून नोंदणी करावी.