सातारा : ‘सायबर शिक्षा फॉर सायबर सुरक्षा’ या जनजागृती उपक्रमाचे आयोजन सातारा जिल्हा परिषदेच्या बांधकाम विभागात करण्यात आले. वाढत्या डिजिटल वापरामुळे ऑनलाइन सुरक्षेची आवश्यकता लक्षात घेऊन हा उपक्रम राबविण्यात आला.

या कार्यक्रमाला उपमुख्य कार्यकारी अधिकारी श्री. निलेश घुले यांनी प्रमुख उपस्थिती दर्शवली. कर्मवीर भाऊराव पाटील इन्स्टिट्यूट ऑफ मॅनेजमेंट स्टडीज अँड रिसर्च, सातारा आणि क्विक हिल फाउंडेशन यांच्या संयुक्त विद्यमाने हा उपक्रम पार पडला. विद्यार्थी श्रद्धा कुंभार आणि आदित्य कांबळे यांनी प्रभावी समन्वय साधून कार्यक्रम यशस्वीपणे पार पाडला.

या प्रसंगी सहभागी कर्मचाऱ्यांना मजबूत पासवर्डचा वापर, फिशिंग हल्ल्यांपासून बचाव, सोशल मीडियावरील सुरक्षितता, तसेच अँटीव्हायरस आणि इतर सुरक्षा साधनांचा योग्य वापर या विषयांवर मार्गदर्शन करण्यात आले.

हा उपक्रम ‘सायबर शिक्षा फॉर सायबर सुरक्षा’ अभियानाचा एक महत्त्वाचा भाग असून, सातारा जिल्ह्यातील विविध शासकीय विभागांमध्ये सायबर जनजागृती पोहोचविण्याचे उद्दिष्ट आहे. पुढील काळातही अशा उपक्रमांचे सातत्याने आयोजन केले जाणार आहे.

या उपक्रमासाठी संस्थेचे संचालक प्रा. बी. एस. सावंत (डायरेक्टर) यांचे विशेष पाठबळ लाभले. तसेच डॉ. आर. डी. कुंभार (प्रमुख, संगणक विभाग) आणि प्रा. पी. ए. लोखंडे यांच्या मार्गदर्शनामुळे हा उपक्रम अधिक परिणामकारक ठरला.