प्रतापगड : छत्रपती शिवाजी महाराजांची यशोगाथा सांगणार्‍या किल्ले प्रतापगडावर संर्वधनाची कामे सुरू आहेत. ही कामे दर्जेदार व गुणवत्ता पूर्ण करावी. स्थानिकांना या कामाचा कोणताही त्रास होता कामा नये. यापुढेही प्रतापगडाला पर्यटन खात्याच्यावतीने भरघोस निधी दिला जाईल, अशी ग्वाही पर्यटनमंत्री ना. शंभूराज देसाई यांनी दिली. 

ना. शंभूराज देसाई यांनी बुधवारी प्रतापगड किल्ल्याला भेट दिली यावेळी ते बोलत होते. यावेळी पोलीस अधीक्षक समीर शेख, उपवनसंरक्षक आदिती भारद्वाज, अपर जिल्हाधिकारी जीवन गलांडे, जिल्हा नियोजन अधिकारी शशिकांत माळी, तहसीलदार तेजस्विनी पाटील, विजय नायडू कुमार शिंदे, विलास मोरे, चंद्रकांत उतेकर, कादर सय्यद, आनंद उतेकर सोनू साळवी यांच्यासह ग्रामस्थ उपस्थित होते.

पाहणीदरम्यान ना. देसाई यांनी कुठल्याही प्रकारचे चुकीचे काम होवू देवू नये, अशा सूचना करत किल्ल्याची पाहणी करत बदल सुचवले. तसेच पर्यटन विभागातून भरघोस निधी दिला जाईल. प्रतापगडच्या पायथ्याशी पर्यटन विभागामार्फत काम सुरू आहे. हे काम सुरू असताना ग्रामस्थांना कोणताही त्रास होणार नाही, याची काळजी घ्यावी. किल्ल्यावरील लाईट, वाहतूक कोंडी, रस्ता रूंदीकरण व पार्किंग संदर्भात मंत्रालयात बैठक लावून प्रश्न मार्गी लावले जातील, अशी ग्वाही ना. देसाई यांनी दिली. यानंतर शिवाजी महाराज यांच्या पुतळ्याला अभिवादन करुन भवानी मातेच्या मंदिरात जावून दर्शन घेतले. यावेळी प्रतापगडचे किल्लेदार अभयसिंह हवालदार यांनी शिवप्रताप दिनासाठी कायमस्वरूपी निधीची तरतुद करावी, अशी मागणी केली.