सातारा : सातारा येथील शाहूनगर परिसरातील हिंदकेसरी बलमाचा गोठा परिसरात सायंकाळी साडेसात ते आठच्या दरम्यान परिसरातील युवक वेदांत मोरे व संजय मोरे हे आपल्या दुचाकीवरून घरी जात असताना अचानक त्यांच्या समोर बिबट्या आला. दुचाकी पाहिल्याने बिबट्या सरळ शेतात घुसला. 

वेदांत मोरे व संजय मोरे यांनी परिसरातील नागरिकांना बिबट्या दिसल्याचे सांगितले, परिसरातील मंडळाच्या कार्यकर्त्यांनी वनविभागाच्या अधिकाऱ्यांशी संपर्क साधून बिबट्याचे दर्शन झाल्याचे कळवले. थोड्याच वेळात वनविभागाच्या अधिकाऱ्यांसह कर्मचारी शाहूनगर परिसरात दाखल झाले व बिबट्याच्या शोध मोहिमेस प्रारंभ झाला. बिबट्याचे दर्शन झाल्याने परिसरातील नागरिकांमध्ये भीतीचे वातावरण निर्माण झाले आहे. मात्र वनविभागाचे कर्मचारी व परिसरातील मंडळाच्या सदस्यांनी नागरिकांना दिलासा देत शोध मोहीम सुरू ठेवली. परिसरातील नागरिकांनी आपल्या लहान मुलांना बाहेर सोडू नये, तसेच आपल्या पाळीव जनावरांची काळजी घ्यावी.शक्यतो विजेचे दिवे सुरू ठेवावेत, असे आवाहन मंडळाच्या सदस्यांनी केले आहे.