सातारा : सातारा जिल्ह्यातील दिव्यांग बांधवांच्या प्रलंबित मागण्यासाठी दिव्यांग प्रेरणा सामाजिक संघटनेच्या वतीने पालकमंत्री शंभूराज देसाई यांच्या पोवई नाका येथील निवासस्थानासमोर पुन्हा ठिय्या आंदोलन करण्यात आले. या आंदोलनाच्या वेळी पोलिसांनी हस्तक्षेप करण्याचा प्रयत्न केला तरी दिव्यांग बांधवांनी तेथेच बसकन मारली. 

दिव्यांग प्रेरणा सामाजिक संघटनेचे संस्थापक अध्यक्ष अजय पवार, अविनाश कुलकर्णी, सुदर्शन मालवणकर, शैलेंद्र बोर्डे, नितीन शिंदे, अमोल भातुसे, लतिका जगताप, नंदकुमार जगताप, दशरथ लोखंडे, नामदेव मुळे, मानाजी लोहार, कृष्णा पवार यांनी आंदोलनात सहभाग घेतला होता. दिव्यांग बांधवांच्या संदर्भात शासकीय कार्यालयामध्ये सुविधा उपलब्ध व्हाव्यात, शंभर टक्के घरफाळा माफ व्हावा, दिव्यांग व्यक्तींना रिक्षावाटप व्हावे, अशा विविध मागण्यांसाठी दिव्यांग संघटनेचा सातत्याने लढा सुरू आहे. सोमवारी सुद्धा दिव्यांग बांधवांनी पालकमंत्र्यांच्या घरासमोर चुकीच्या कारवाईबद्दल अतिक्रमणाचा पवित्रा घेतला होता.

पालकमंत्री शंभूराज देसाई यांच्या निवासस्थानासमोर दिव्यांग बांधवांनी घटस्थापनेच्या पूर्वसंध्येला दुपारी बारा वाजता अचानक बसकन मारली. सुमारे तासभर हे आंदोलन सुरू होते. पोलिसांनी पुन्हा आंदोलकांची समजून घालून त्यांना आंदोलन करण्यापासून परावृत्त करण्याचा प्रयत्न केला. जिल्हा प्रशासनाने आमच्या मागण्या संदर्भात ठोस कारवाई करावी, अशी मागणी अजय पवार यांनी केली आहे.