मल्हारपेठ : येथील लोकनेते बाळासाहेब देसाई ग्रामसचिवालय इमारतीच्या नूतनीकरण, नामकरण समारंभाचे उद्घाटन राज्याचे मुख्यमंत्री एकनाथ शिंदे यांच्या हस्ते झाले. 

यावेळी सातारा जिल्ह्याचे पालकमंत्री शंभूराज देसाई, केंद्रीय राज्यमंत्री प्रतापराव जाधव, ना. महेश शिंदे, कारखान्याचे चेअरमन यशराज देसाई, पंचायत समिती सदस्य सुरेश पानस्कर, सरपंच किरण दशवंत, कारखान्याचे संचालक सुनील पानसकर, अशोक डिगे, उपसरपंच पुरुषोत्तम चव्हाण, सदस्य नितीन दशवंत, सूर्यकांत पानसकर, ग्रामविकास अधिकारी प्रमोद ठोके आदी मान्यवर उपस्थित होते.

पाटण तालुक्यातील पहिल्याच निर्माण झालेल्या ग्रामसचिवालय इमारतीचे उद्घाटन २००१ मध्ये तत्कालीन मुख्यमंत्री नारायण राणे यांच्या हस्ते झाले होते. यानंतर तब्बल २० वर्षानंतर पुन्हा या ग्रामसचिवालय इमारतीच्या नूतनीकरणासाठी ग्रामपंचायतीवतीने पालकमंत्री देसाई यांच्याकडे याबाबतच प्रस्ताव पाठवला होता, यावर तातडीने जनसुविधा योजनेमधून ५० लाखांचा निधी मंजूर करण्यात आला. या कामाचे नूतनीकरण अत्याधुनिक पी.सी.पी क्लाईडमध्ये फक्त दोनच महिन्यात करण्यात आले. यामध्ये अद्ययावत लाईट व्यवस्था, ग्रामसचिवालय इमारतीमध्ये लोकनेत्यांची थ्रीडी अक्रॅलिक पध्दतीची २० फुटाची प्रतिमा लावण्यात आली आहे. यासह आकर्षक रोषणाई करण्यात आली आहे. रविवारी सकाळपासून नवारस्ता येथे छ.शिवरायाचा अश्वारुढ पुतळा, लोकार्पण सोहळा पाहण्यासाठी व मल्हारपेठ येथील ग्रामसचिवालय इमारतीच्या नूतनीकरण समारंभासाठी मुख्यमंत्री एकनाथ शिंदे येणार असल्याने सकाळपासून पोलिसांचा मोठा बंदोबस्त ठेवण्यात आला होता. मुख्य कार्यक्रम स्थळ व विविध उदघाटनाच्या निमित्ताने कार्यकर्त्याची मोठी गर्दी होती.