सातारा : श्री आनंद नटराज व शिवकामसुंदरी या देवतांच्या कृपेने आणि श्री कांची कामकोटी पिठाचे महास्वामी, परमपूज्य शंकराचार्य श्री चंद्रशेखरेन्द्र सरस्वती स्वामी ,तसेच परमपूज्य श्री जयेंद्र सरस्वती व परमपूज्य विद्यमान पीठाधीपती, श्री शंकर विजयेन्द्र सरस्वती स्वामी, यांचे पूर्णानुग्रह आणि शुभाशीर्वादाने सातारा येथील श्री उत्तर चिदंबरम नटराज मंदिरातील सर्व देवतांचा वार्षिक रथोत्सव सोहळा नटराज मंदिरात बुधवारी सायंकाळी पाच वाजता ब्रह्मवृंदांच्या वेदमंत्राच्या जयघोषात ध्वजारोहण व प्रधान संकल्प होऊन प्रारंभ झाला. गुरुवारी सकाळी सहा ते बारा या वेळेत कार्यक्रम संपन्न झाले. 

यावेळी वेदमूर्ती दत्ता शास्त्री जोशी व वेदमूर्ती जगदीश शास्त्री भट्ट गुरुजी यांच्या मार्गदर्शनाखाली वेदाध्ययन करणाऱ्या अनेक ब्रह्मवृंदांच्या उपस्थितीत हा धार्मिक सोहळा संपन्न झाला. नटराज मंदिराचे व्यवस्थापकीय विश्वस्त रमेश शानभाग व त्यांच्या पत्नी सौ. उषा शानभाग यांच्या हस्ते हा पुण्याहवाचन कार्यक्रम संपन्न झाला. सायंकाळी मंदिरातील राधा-कृष्णाचा विवाह सोहळा अर्थात कल्याण उत्सव संपन्न झाला. दरम्यान प्रधान संकल्प मध्ये संपूर्ण जगात शांतता नांदावी, सर्वांचे कल्याण व्हावे. सर्वांना दीर्घ आरोग्य, आयुष्य लाभावे. तसेच संपूर्ण जगावर येऊ घातलेल्या अनेक विविध प्रकारच्या आपत्तीतून तसेच विविध रोगांचा नाश पाहून ही पृथ्वीवरील समस्त प्रजा ही आनंदी सुख समाधान पूर्ण आणि दीर्घ आरोग्य असे आयुष्य जगणारी व्हावी हाच संकल्प सोडला. यावेळी नटराज मंदिराचे व्यवस्थापक चंद्रन, मार्गदर्शक नारायणराव व विविध क्षेत्रातील मान्यवर उपस्थित होते. शुक्रवार दि.10 जानेवारी रोजी सकाळी सहा ते दुपारी बारा या वेळेत घटस्थापना मंदिरातील सर्व देवतांचे मूलमंत्र, जप, होम, पूर्णाहूती व आरती होणार आहे. दरम्यान शनिवार दि. 11 जानेवारी रोजी सकाळी 6 ते 12 या वेळेत होम हवन, आरती, प्रसाद होऊन दुपारी 3 ते 6 या वेळेत मंदिरातील श्री महागणपतीचा रथोत्सव आणि दीपोत्सव सोहळा होणार आहे.

 या रथोत्सव कार्यक्रमात विविध धार्मिक कार्यक्रमांंबरोबरच रथ पूजन व रथप्रस्थानाचा मुख्य सोहळा रविवार दि. 12 जानेवारी 2025 रोजी सकाळी आठ वाजता होणार आहे. या रथोत्सवाचे पूजनासाठी सातारचे जिल्हाधिकारी संतोष पाटील व त्यांच्या सुविद्य पत्नी, तसेच पुणे येथील श्री सत्य साई निकेतन हायस्कूल आणि वसुंधरा ग्रीन बायो एनर्जी चे चेअरमन सुदर्शन मुदलियार व त्यांच्या पत्नी सौ. विजयालक्ष्मी मुदलियार यांच्या शुभहस्ते या रथाचे पूजन होणार आहे.

 या उत्सवातील रविवारी दि.12 जानेवारी रोजी मुख्य रथोत्सवाचा कार्यक्रम होऊन पहाटे पाच वाजता गणपती होम व मूर्तीचे यात्रा दान होऊन सकाळी आठ ते नऊ या वेळेत रथ पूजन आणि रथ प्रस्थान होणार आहे. संपूर्ण सातारा शहरातून हा रथ नटराज मंदिरातून बाहेर पडल्यावर बॉम्बे रेस्टॉरंट चौकातून जिल्हा परिषद अध्यक्ष निवासस्थानावरून साई मंदिर, गोडोली तेथून पोवई नाका, नगरपालिका चौक, कमानी हौद, देवी चौक मार्गे मोती चौकातून राजवाडा येथे येऊन त्यानंतर मोती चौकातून सदाशिव पेठ मार्गे, 501 पाटी, शनिवार पेठ मार्गे पोलीस मुख्यालयावरून, पोवई नाका येथे येऊन त्यानंतर कुबेर गणपती मंदिर मार्गावरून डीएसपी बंगला तसेच पुन्हा नटराज मंदिरात सायंकाळी सहा वाजता परत येणार आहे. सायंकाळी रथ आगमन झाल्यावर भक्तांच्या उपस्थितीत महामंगल आरती व प्रसाद वितरण होणार असून सोमवार दि. 13 जानेवारी रोजी पहाटे पाच ते दुपारी बारा या वेळेत पुणे येथील राधाकृष्ण शास्त्री मेमोरियल ट्रस्टच्या वतीने श्री नटराज देवाला महाअभिषेक, लघुरुद्र व शिवकाम सुंदरी व नटराज यांचा कल्याणउत्सव अर्थात लग्नसोहळा संपन्न होऊन त्यानंतर आरती व महाप्रसाद वितरण होणार आहे.

हा रथोत्सव मंदिराच्या वतीने जनता जनार्दनाच्या देणग्यांमधून केला जातो. सर्वांनी या धार्मिक कार्यक्रमात मोठ्या संख्येने तन- मन- धनाने सहभागी व्हावे व आनंद घ्यावा, असे आवाहन नटराज मंदिर चे समस्त विश्वस्त, रथोत्सव सेवा समितीचे सदस्य व व्यवस्थापकीय विश्वस्त रमेश शानभाग यांनी केले आहे.