सातारा : ढोरोशी केंद्रातील सर्व प्राथमिक व माध्यमिक शिक्षकांसाठी “अध्यापनात कृत्रिम बुद्धिमत्तेचा वापर” या विषयावर कार्यशाळेचे आयोजन जिल्हा परिषद शाळा, ढोरोशी येथे करण्यात आले. ही कार्यशाळा ढोरोशी सरपंच महेंद्र मगर यांच्या संकल्पनेतून केंद्रप्रमुख प्रल्हाद पवार , मुख्याध्यापक संतोष निकम यांच्या सहकार्याने यशस्वीरीत्या पार पडली.

या कार्यशाळेचा उद्देश शिक्षकांना कृत्रिम बुद्धिमत्ता (AI) ची मूलभूत समज करून देणे, अध्यापन अधिक परिणामकारक व विद्यार्थी केंद्रित बनवणे तसेच शाळांमध्ये डिजिटल परिवर्तन घडवून आणणे हा होता.

सदर कार्यशाळेत शिक्षकांना AI साधनांचा अध्यापनात कसा वापर करता येतो याचे थेट प्रात्यक्षिक दाखवण्यात आले. गृहपाठ, प्रश्नपत्रिका, क्विझ स्वयंचलित तयार करणे, विद्यार्थ्यांच्या प्रगतीचे विश्लेषण करणे, भाषांतर व उच्चार तपासणी, आकर्षक चित्रे , व्हिडिओ तयार करून शिकवणे अशा अनेक गोष्टी AI च्या सहाय्याने कशा करता येतात याची माहिती देण्यात आली.

ChatGPT, Gemini, Copilot, Grammarly, Khan Academy Tools, Google Lens, Microsoft Translator, Canva AI, DALL-E तसेच Speech-to-Text अशा विविध AI साधनांचे उपयुक्तता व प्रत्यक्ष वापर कार्यशाळेत दाखवण्यात आले.

AI मुळे शिक्षकांचा वेळ वाचतो, प्रत्येक विद्यार्थ्याला वैयक्तिक शिकवणी देता येते, तसेच विद्यार्थ्यांच्या शिकण्यातील रस वाढतो हे फायदेही अधोरेखित करण्यात आले.

या कार्यशाळेत प्रशांत आमणे, संचालक साई कॉम्प्युटर्स, तारळे यांनी अत्यंत सोप्या भाषेत व थेट प्रात्यक्षिकांद्वारे मार्गदर्शन केले. यावेळी सरपंच महेंद्र मगर, पाटण पंचायत समितीच्या गट शिक्षणाधिकारी श्रीम. दीपा बोरकर , राजू पवार , बाबासाहेब खेडेकर उपस्थित होते.