सातारा : गणेश विसर्जन मिरवणुकीत वाजणाऱ्या वाद्यांच्या गोंगाटाने सातारा शहरातील कमकुवत इमारतींना धोका संभवतो. याबाबतची संभाव्य दुर्घटना टाळण्यासाठी महाराष्ट्र प्रदूषण नियंत्रण मंडळाने दक्षता घेण्याच्या सूचना सातारा पालिकेने प्रदूषण नियंत्रण मंडळाला केल्या आहेत.

गणेशोत्सव विसर्जन मिरवणुकीत मोठ्या प्रमाणावर डॉल्बी, ढोल ताशा वगैरे वाद्ये मोठ्या आवाजात वाजविण्यात येतात. या वाद्यांच्या आवाजाने सातारा शहरातील जुन्या कमकुवत इमारतींना धोका संभवतो व या इमारती पडून जीवित अथवा वित्तहानी होण्याची शक्यता नाकारता येत नाही. 

सातारा शहरातील जुन्या धोकादायक इमारती उतरवून घेण्याबाबत संबंधितांना पालिकेकडून नोटीसा देण्यात आलेल्या आहेत. परंतु मालक- भाडेकरू वाद न्यायालयात प्रलंबित असल्याने सातारा पालिकेस या धोकादायक इमारती उतरवणे शक्य होत नाही. त्यामुळे गणेश विसर्जन मिरवणुकी दरम्यान कोणतीही दुर्घटना टाळण्यासाठी वाद्यांच्या ध्वनीची तीव्रता शासनाच्या नियमानुसार ठेवण्याबाबत महाराष्ट्र प्रदूषण नियंत्रण मंडळाला दक्षता घेण्याबाबत सातारा पालिकेने कळविले आहे.