पुणे : पुणे आणि पिंपरी शहरात गुलेन बॅरी सिंड्रोम या मेंदूविषयक आजाराचा धोका वाढला आहे. येथे आतापर्यंत १०१ रुग्णांची नोंद झाली आहे. यापैकी ६२ रुग्ण पुणे ग्रामीण, १९ रुग्ण पुणे महापालिका, १४ रुग्ण पिंपरी चिंचवड महापालिका आणि ६ रुग्ण इतर जिल्ह्यातील आहेत. त्यामध्ये ६८ पुरुष आणि ३३ महिला आहेत. यापैकी १६ रुग्ण व्हेंटिलेटरवर आहेत. रुग्णांमध्ये तीव्र लक्षणे दिसून येत असल्याने त्यांना खासगी रुग्णालयांमध्ये दाखल करण्यात आले आहे. दरम्यान, गुलेन बॅरी सिंड्रोम (GBS) प्रकरणे हाताळण्यासाठी महाराष्ट्राला मदत करण्यासाठी ७ सदस्यीय केंद्रीय उच्चस्तरीय तज्ज्ञ पथकाची नियुक्ती करण्यात आल्याची माहिती अधिकृत सूत्रांनी दिली आहे.

दरम्यान, महाराष्ट्राचे आरोग्यमंत्री प्रकाश आबिटकर आज पुण्यात आरोग्य विभाग आणि प्रशासनातील अधिकाऱ्यांसोबत गुलेन बॅरी सिंड्रोमच्या (Guillain-Barre Syndrome) प्रादुर्भावाबाबत आढावा बैठक घेणार आहेत. ते पुण्यातील परिस्थितीचा आढावा घेण्यासाठी रुग्णालयांना भेटी देतील.

सोलापूर जिल्ह्यात गुलेन बॅरी सिंड्रोम बाधित एका संशयित रुग्णाचा मृत्यू झाला आहे, असे वृत्त पीटीआयने आरोग्य अधिकाऱ्यांच्या हवाल्याने दिले आहे. सदर व्यक्ती मूळचा सोलापूरचा आहे. तो पुण्यात आल्यानंतर त्याला या आजाराची लागण झाल्याचा संशय आहे, असे अधिकाऱ्यांनी सांगितले. महाराष्ट्रात जीबीएस संशयिताचा मृत्यू होण्याची ही पहिलीच घटना आहे. 

दरम्यान, पुणे महानगरपालिकेने गुलेन बॅरी सिंड्रोम बाधित रुग्णांवर उपचार करण्यासाठी कमला नेहरू रुग्णालयात ४५ खाटांचा विशेष वॉर्ड तयार केला आहे.