मुंबई : पहिली ते दहावीच्या विद्यार्थ्यांसाठी एक महत्त्वाची सूचना समोर आली आहे. महाराष्ट्रातील शाळा नव्या शैक्षणिक वर्षासाठी 15 जून 2025 पासून सुरू होणार आहेत. पालक आणि विद्यार्थ्यांनी शाळेच्या तयारीला वेग दिला असून नव्या शालेय साहित्याची खरेदी देखील सुरू केली आहे. या दरम्यान एक मोठी बातमी समोर आली आहे. यंदा शाळांच्या वेळापत्रकात मोठा बदल करण्यात आला आहे. आता शाळा सकाळी 7 ऐवजी 9 वाजता सुरू होणार आहेत.

महाराष्ट्र बोर्डाच्या शाळांसाठी नवे नियम

महाराष्ट्र राज्य शिक्षण मंडळाने शैक्षणिक वर्ष 2025-26 साठी शाळांच्या वेळा बदलण्याचा निर्णय घेतला आहे. यंदा 15 जूनपासून सुरू होणाऱ्या शाळा सकाळी 9 वाजता सुरू होऊन सायंकाळी 4 वाजता सुटतील. म्हणजेच, शाळेची वेळ सकाळी 9 ते सायंकाळी 4 अशी निश्चित करण्यात आली आहे. हा बदल राज्यातील सर्व महाराष्ट्र बोर्डाच्या शाळांना लागू असेल.

नव्या वेळापत्रकाचा तपशील

नव्या वेळापत्रकानुसार, शाळा सकाळी 9 वाजता सुरू होईल. पहिल्या 15 मिनिटांत म्हणजे 9:00 ते 9:25 पर्यंत प्रार्थना आणि परिपाठ होईल. त्यानंतर 9:25 ते 11:24 पर्यंत पहिल्या तीन तासिका (लेक्चर्स) होतील. 11:25 ते 11:35 या वेळेत 10 मिनिटांची छोटी सुट्टी असेल. 11:35 ते 12:50 पर्यंत पुढील दोन तासिका होतील. 12:50 ते 1:30 पर्यंत मध्यान्ह सुट्टी असेल. त्यानंतर 1:30 ते 3:55 पर्यंत उर्वरित तासिका होतील. शेवटच्या 5 मिनिटांत राष्ट्रगीत आणि इतर समारोपाचे कार्यक्रम होऊन शाळा सुटेल.

शाळांचे सुरू होण्याचे नियोजन

राज्यातील शाळा लवकरच नव्या उत्साहाने सुरू होणार आहेत. उन्हाळी सुट्ट्या संपल्यानंतर शाळा पुन्हा गजबजण्यास सज्ज आहेत. महाराष्ट्र राज्य शिक्षण मंडळाच्या शाळा 15 जूनपासून, तर CBSE बोर्डाच्या शाळा 10 जूनपासून सुरू झाल्या आहेत. विदर्भातील काही जिल्ह्यांमध्ये शाळा 20 जूनपासून सुरू होतील, कारण तिथे इतर भागांच्या तुलनेत उशिरा शैक्षणिक वर्ष सुरू होते. राज्यातील उर्वरित सर्व शाळा 15 जूनपासून नियमितपणे सुरू होतील.

विद्यार्थ्यांसाठी सकारात्मक बदल

शिक्षण विभागाने या नव्या वेळापत्रकामुळे विद्यार्थ्यांच्या दैनंदिन जीवनावर सकारात्मक परिणाम होईल, असा दावा केला आहे. सकाळी 9 वाजता शाळा सुरू होण्याने विद्यार्थ्यांना पुरेशी विश्रांती मिळेल आणि शाळेची तयारी करण्यासाठी पुरेसा वेळ मिळेल. शिक्षण विभागाने पालक आणि विद्यार्थ्यांना नव्या वेळापत्रकानुसार आपले नियोजन करावे आणि शाळेच्या नव्या नियमांचे पालन करावे, अशी विनंती केली आहे.