सातारा : सातारा- विकासकामांच्या माध्यमातून सातारा- जावली मतदारसंघातील प्रत्येक गावाचा कायापालट करण्याचा प्रयत्न केला आहे. आगामी काळात आपला मतदारसंघ रोल मॉडेल ठरेल असे व्हिजन डोळ्यासमोर ठेवून उपाययोजना केल्या जाणार आहेत. समस्त सातारकर आणि सातारा- जावली मतदारसंघातील जनता विकासाच्याच पाठीशी उभी राहणार आहे. त्यामुळे माझा विजय हि काळ्या दगडावरची पांढरी रेघ आहे. सर्वांनी कमळाला मतदान करून मला विक्रमी मतांनी विजयी करावे, असे आवाहन आ. शिवेंद्रराजे भोसले यांनी केले. 

सातारा- जावली विधानसभा मतदारसंघाचे भाजप महायुतीचे अधिकृत उमेदवार शिवेंद्रराजे भोसले यांच्या प्रचारार्थ सातारा शहरात विविध भागांमध्ये कोपरा सभांचा धडाका सुरु आहे. पदयात्रा, कोपरा सभा, मेळावा आणि प्रचार दौऱ्याला भाजप, राष्ट्रवादी अजित पवार गट, शिवसेना शिंदे गट, आरपीआयसह महायुतीतील सर्व घटकपक्षांचे पदाधिकारी, कार्यकर्ते, दोन्ही आघाड्यांचे सर्व आजी - माजी पदाधिकारी, आजी- माजी नगरसेवक, कार्यकर्ते आणि नागरिक यांचा मोठा प्रतिसाद मिळाला. सकाळी पदयात्रा आणि रात्री कोपरा सभा, मेळावा यामुळे संपूर्ण सातारा शहरात आ. शिवेंद्रराजेंचा बोलबाला आहे. पदयात्रा, कोपरा सभा आणि युवक मेळाव्याला मोठा प्रतिसाद मिळत असून सातारा शहरातून आ. शिवेंद्रराजेंना मताधिक्य देण्यासाठी शहरातील प्रभागांमध्ये चढाओढ लागली आहे. 

नुकत्याच झालेल्या कोपरा सभेत आ. शिवेंद्रराजेंनी सातारा शहरासह सातारा- जावली मतदारसंघात झालेल्या विकासकामांची माहिती देतानाच आगामी काळात करावयाच्या विकासात्मक अजेंड्याबाबतची माहिती नागरिकांना दिली. विरोधक फक्त निवडणुकीपुरते उगवणारे आहेत. त्यामुळे त्यांच्या भूलथापांना जनता कदापि भुलणार नाही. खोटी आश्वासने देऊन आणि मोठमोठ्या वलग्ना करून विकास होत नसतो. विकासकामे कोण करतंय हे सातारा जावलीतील जनतेला चांगलेच माहिती आहे. मतदारांनी विकासाला साथ देऊन कमळाला मोठ्या मताधिक्याने विजयी करावे, असे आवाहन आ. शिवेंद्रराजेंनी याप्रसंगी केले.