कोरेगाव : कोरेगाव शहर आणि परिसराचा गतिमान विकास होत असून शहराच्या सौंदर्यात भर पडणारे असे सुसज्ज एस.टी. बसस्थानक उभारले जाणार आहे. विधिमंडळाचे अर्थसंकल्पीय अधिवेशन दि. 3 मार्च रोजी सुरू होत आहे. तत्पूर्वी बस स्थानकाच्या नवीन इमारतीसाठी निधीची तरतूद केली जाईल, अशी घोषणा आ. महेश शिंदे यांनी केली.

कोरेगाव नवीन एस. टी. बसस्थानक परिसरातील वाहनतळाच्या काँक्रिटीकरणाचा शुभारंभ आ. महेश शिंदे यांच्या उपस्थितीत झाला. यावेळी जिल्हा नियोजन समितीचे सदस्य राहूल बर्गे, माजी नगराध्यक्ष प्रशांत उर्फ राजाभाऊ बर्गे, नगराध्यक्ष दिपाली महेश बर्गे, आगार व्यवस्थापिका नीता जगताप उपस्थित होते.

आ. महेश शिंदे म्हणाले, महायुती सरकारच्या पहिल्या टर्ममध्ये महाराष्ट्र राज्य औद्योगिक विकास मंडळाच्या माध्यमातून निधीची उपलब्धता करून घेऊन एस. टी. बसस्थानक परिसराचा काँक्रिटीकरण करण्याचा निर्णय घेण्यात आला होता. त्यासाठी दोन कोटी 81 लाख रुपये मंजूर करण्यात आले आहेत. आज या कामाचा शुभारंभ होत आहे. एस. टी. अधिकारी, कोरेगाव विकास आघाडीचे पदाधिकारी, नगरपंचायतीचे पदाधिकारी यांनी एकत्रित बसून आजच्याआज आर्किटेक्टमार्फत एस. टी. बसस्थानक परिसराचा विकास आराखडा आणि नवीन इमारत आदीचा प्रस्ताव तयार करावा. त्याचबरोबर एस. टी. महामंडळाने अंदाजपत्रक तयार करून द्यावे. विधिमंडळ अधिवेशनापूर्वीच त्यासाठी निधीची तरतूद मुख्यमंत्री ना. देवेंद्र फडणवीस यांच्या माध्यमातून करून घेतली जाईल, अशी ग्वाही आ. शिंदे यांनी दिली.

कोरेगाव आगारासाठी दहा नवीन एस. टी. बसेस देण्याचा शब्द परिवहन मंत्री ना. प्रताप सरनाईक यांनी आपल्याला दिला आहे. लवकरच या बसेस कोरेगावात दाखल होतील. एस. टी. बसस्थानकाच्या बाहेरच्या बाजूला असलेल्या तडवळे रस्त्याचे काँक्रिटीकरण केले जात आहे. बंदिस्त गटारांद्वारे सांडपाणी व्यवस्थापन केले जात आहे. सर्वांनी शहर आणि परिसर सुशोभित राहील, यासाठी प्रयत्न करावेत. शहराच्या सौंदर्याला गालबोट लागणार नाही, याची सर्वांनी दक्षता घ्यावी, असे आवाहन देखील आ. महेश शिंदे यांनी केले.

आगार व्यवस्थापिका नीता जगताप, वाहतूक नियंत्रक राजेंद्र बर्गे, सहाय्यक वाहतूक निरीक्षक धीरज भुजबळ, चालक सचिन जगताप यांच्यासह सातारा जिल्हा एस. टी. प्रवासी संघटनेचे अध्यक्ष विलास शहा यांनी विविध अडचणींबाबत माहिती दिली. कोरेगाव विकास आघाडीचे समन्वयक संतोष नलावडे यांनी स्वागत केले.

कार्यक्रमास माजी उपनगराध्यक्ष जयवंत पवार, सुनीलदादा बर्गे, माजी नगरसेवक महेश साहेबराव बर्गे, सचिनभैय्या बर्गे, नगरसेवक साईप्रसाद बर्गे, राजेंद्र वैराट, प्रीतम शहा, नगरसेविका स्नेहलता आवटे, वनमाला बर्गे, संजीवनी बर्गे, शितल बर्गे, संगीता ओसवाल, माजी नगरसेवक रशीद शेख, गजाभाऊ बर्गे, दिलीप बर्गे, विजय घोरपडे, अर्जुनदादा आवटे, दीपक कांबळे, महेश बर्गे, महादेव जाधव, संतोष बर्गे, दीपक फाळके, श्रीकांत बर्गे, रोहन जाधव उपस्थित होते.